Remembering Typhoon Frank dated June 21, 2008

I emailed this blog to my extended family 4 years ago, July 19, 2008 to be exact and would like to share this with you guys how great is our God over the flood.  Pardon if you can't understand some of them because it was written in Akeanon/Aklanon dialect.  

"Share ko man kinyo ang mga first time experience pag bagyo ha.... Kara ma lang ko kaistorya hay, kara eang ako nakapungko gid sa internet nga daya ang panaw.  Ga sang buean eon do pagbaha iya sa 21. Agahon pa karon hay eain eagi do huyop it hangin.  Do amon nga atop sa ibabaw (kwarto ko) hay matsa bulador eagi sa kabaskugon it hangin.  Mayad eang eani hay naisipan namon ni Tatay nga higtan do baeayan it sim eani wa mat-a maw naeopad.  Nag adto eang do katunga it baeayan it sim sa pihak nga portion it kwarto.  

Matsa amo ako ki ah nga gakabit-kabit habang gahigot ako.  Wa mat-a ko nakoebaan hay grabe mat-a ang pamuyot.  Pangamuyo lang ako sa ibabaw don hay agod di mahueog.  Di eon abi kasaka si Tatay sa mga makaruyon hay gueang eon bi, gakurog ra siki.  Buligan ko lang maw it higot man sa mga lawanit, sa mga dingding.  Tapos karon hay gin secure ko eagi do mga files ag gin pangtago peras ko mga ginalakad ko pa nga mga eogta nanday Ng Kris, tago ko eagi sang aparador.  Wa mat a nabasa.  

Daeagan kami ni Tatay panaog bitbit do bible ag cp ay basi kami pintaean sa kabaskugon it hangin.  Wa gid it signal halin kato. Gusto man namon mag text hay di man magsend.  Pabay an lang namon do kwarto nga maguba basta buhi mat a kami.  Nahueog do dingding sang kwarto, sangkahaligi ma lang.  May purpose man gapon kung haman naguba hay gapaislis eon it bag o. hehehehe...  Buhay eon man abi ag ginaproblemahan man namon kung san o ilisan gani ginbuligan lang man kami it bagyo kung paalin eon maw islan. .

Abo nga nagkaeatumba nga mga puno sa amon nga prente pero mayad eang hay bukon sa baeay.  Do mga ginaproblemahan nga mga puno kung paalin tapson hay kusa mat-a nga nabali gani madali lang tapson agod gahawan.  Biskan mauean hay gintinapas namon sang magueang nga baye do mga kahoy hay di kami kaagi mag guwa ag nagasab-eay sa mga wiring.  Si Tatay ma lang bi do eaki sa amon gani wa man it iba nga gaobra kundi kami man.  Mayad eang eani hay ubos namon it pangtapas do mga sanga-sanga bago nagsueod do baha sa amon dapit.  

Nagkatuoeg eang kami it madali hay ginaoy pero haron eot-a do baha sa pihak baeay, kataas eot-a.  Mga ala-ona it hapon nagsueod do baha sa pihak baeay.  Ayawan ko it sag-a sa sueod baeay nga mabuoe do tubi pero gatinaas ta, gali tana hay nagsueod eot-a gali do tubi sa amon.  First time natabo nga ginsudlan kami it baha.  Eversince mat-a abi hay wa mat a ginabahaan don hay mataas nga portion do ginatindogan it amon nga baeay pero datong adlaw hay nasudlan ta.  Nageapos do mga tubi sa pader it kaeapit baeay pasueod sa among baeay.  Hakwat man kami it mga gamit don agod di maabot.  Taga tuhod sa sueod it baeay do tubi ag hawak sa guwa.  Sa may karsada namon hay taga leog eot-a.  Isip namon hay basi eapaw eot a do tubi sa may tulay kaya mataas ta do tubi sa amon.  

Mga alas dyes eot-a it gabii naghubas do tubi ag alas dose hay puro eon eotay do saeog.  Halin ta abi sa bukid do baha.  Kapilit pilit do aeagyan kung magtikang kami.  Sag-a ag limpyo eon dayon don bilog nga adlaw it domingo.  Abo nga nagkaeatumba nga mga puno it mangga sa karsada.  Mislotang baguio hay nagzigzag eot a do karsada nga dati hay tadlong tapos may mga hump pa.  Di maagyan do karsada pakalibo hay abo gapon nga eotay, tuhod pat a abi do mga eotay sa may Bulwang ag haeos sirado do mga daean it mga puno it mga mangga.  Gahimatuon gali it baktas do mga tawo kon.  

Do masadya sa natabo hay, sabado it pagbaha hay wa gid kami it makaon nga iba.  Although gin hakwat namon do bueotangan it bugas ag ginbutang sa bangko, lisod mag eaha hay puro mga basa do panggatong.  Mayad mat-a magpanghikutar do Ginuo kamon hay ginprovide na kami it pagkaon.  Do manogtinapay hay gin aywan na da baligya kanday lolo nga baeay ay mataas eon eani do baha, di eon nana mahakwat da baligya.  Mga gasanggatos man do sueod it tinapay sa termonches ag dato do amon nga ginkinaon it pamahaw sa hapon, ihapon ag pamahaw sa agahon.  Mantiner eon dayon kami it mga sardinas ag oga sa mga masunod nga kaon namon, busog man gapon ah.  Wa man gali it pili it pagkaon kung wa ka man it pilian. hehhee.  Baw ah, pagkadomingo eon dayon hasta it myerkules hay puro eon karne it baka do suea namon.  Iba-iba eang do putahe.  Gin daehan kami sang ingkampod it karne it baka, tapos nobyo sang manghod, nagdaea man hay abo alaga nga baka, pati si uncle hay bindonggo man daea.  Bukon mat a hingan it mga doble dead.  Saeamat eot a kami hay di eon kami magproblema it suea hay abo supply.   Mga panakot eang galing hay bukon it kompleto hay wa man eani.  Do mantika nga gingamit namon pag eaha hay halin sa naanod nga lapad it mantika.  Wa it stock sa baraka hay, ag nageotaw eotaw ta do lapad, kita sang magueang nga gaeotaw eotaw, tueog eani do 1/4 hay kaeamig.  Ginpangamuyuan mat a tanan do habaton don ay malisod man nga magmasakit.  Wa mat a kami naalin sa kaeooy it Diyos.

Lunes hay, eotayon man gapon ag kalisod lisod magpakalibo.  Pilang oras do traffic ay abo eani nga nakaharang sa karsada.  Nagdaea bi ko it suea sang magueang sa Estancia ag ginpangamusta ko man do sitwasyon nanda idto.  Kung ano kagrabe do natabo sa baryo namon hay doble pa do inagyan it kalibo.  Mistulang kagueangan nga ginsunog sa eotay ag puro wasdak do mga baeay.  Puro gabow do mga saging ki ah. Grabe do eotay as in!  Wa ta eani ako gatanom hay wa ko naila mageosob sa eotay pero pag adto ko it kalibo hay nakatanom gid ako.  Haeos taga tuhod do eotay ki ah.  Uli ka eot ing sa inyo hay halin kat imo sa eanas. Matsa halin ka man sa baryo hay.  Nakipila man ako sa grocery para magbakae it kandila pero wa gid kaabot.  Taeamad eani.  Temprano gali do ihapon ag tueog hay wa it iwag.  Mayad eang sa Makato hay nakabakae ang magueang it kandila.  Wa ta abi haeos sa makato it baha.  Wa gid haeos it mga bukas nga mga establishment sa Kalibo ag Numancia. Abo nga gaumang it bakae it bugas, suea ag mga bueong pero sirado ag do iba hay ginkalitan pa nga in demand do mga supply ag gintaasan pa nanda do presyo. Makita ag makilaea mo gid a do ugali it sangkatawo sa mga makaraya nga sitwasyon.

Sa mga natabo hay, mayad eang hay may simbahan.  Nakakita it pag asa kami biskan paalin.  Wa mat-a kami ginpabay an it Ginuo sa mga pilang adlaw nga gakinahangean kami it pagkaon.  Ona mat a gapon si Lord nga nangprovide kamon.  Biskan naduea do mga pagkabutang, gin eotay man do mga gamit namon, tiis sa wa it power it koryente, sa gihapon hay buhi mat a kami tanan ag mayad mat a do mga pangeawason namon.  Duyon mat a do mabahoe nga inogpasaeamat namon sa Ginuo.  Mayad eang hay may simbahan gid a, mabahoe gid a maw nga bulig.  Nakatao it pag asa biskan ano kaeain do natabo hay sa gihapon hay wa mat a kami ginpabay an.  Nagpanupod mat a do simbahan it mga supply nga bugas at suea.  Mantiner it de lata ag noodles don, piyan piyan sa mga tiyan nga gakaeam.

Kakon mat a hay eobtan ko mat a do sitwasyon pero wa gid ako nagkaroon it paghinayang sa mga natabo. Saeamat mat ang gapon sa Ginuo hay naexperience ko kung paano nabahaan, nakaeosob sa eotay biskan wa ako naila, nagkatueog ako sang kwarto nga bukas do dingding, welcome do mga wakwak magsueod, grabe do eamig sa kwarto kung gabii, ag eabaw sa tanan hay naexperience ko kung paano magpanghikutar do Ginuo sa amon nga kabuhi sa mga makaruyon nga sitwasyon.   Mahambae ko nga perfect man gapon do tanan.  Satisfied mat ang gapon biskan paalin. hehehe.

Makaron do kalibo hay abo gapon nga tapo-tapo. Need mo mag face mask para ok do pagginhawa hay kaeain gid a. Wa pa gid nasipot do mga eotay sa dangan pero gaamat amat eon it bangon sa kaeooy it Diyos. May mga power eon it koryente sa ibang portion it Kalibo. Back to normal eon man do ibang establishment. Pangita eon man do mga tawo don agod may makaon ag mapaobra do baeay.

God is still good all the time........"